Articles from Old Newspapers & Magazines (‘VAURADDEANCHO IXTT’)
Articles from Old Newspapers & Magazines and Translated Articles on MSGR. HERCULANO GONSALVES from Portuguese to English
VAURADDEANCHO IXTT
1st April 1950
MONS. HERCULANO GONSALVES Ontorlo hea sounsarak ho navadik vorsani ani xegunnani borlolo padri. Soglem Goem ani Bomboi aicotoch hea xegunnachea padrichi mornachi khobor, dukhant poddlem ani mirmireani roddlem astelem, caran Mons. Herculano vortoutalo somestache ollkicho ani mogacho. Dissui bor sorbounticho loc romareanim guelo tachea moddeac bett korunc. Sorvoi munis, cristãu toxe concnnem munno nastana taca mantalet, kiteac to sogleanc boro also ani sogleanc borem korunk sodi. Soglem tachem lambdic jivit tannem sarlem Devachea mogan ani peleachea boreponna passot. Zaite duddu tannem zoddle ani apli ghorchi guirescai porian tannem sarli dublleanc adar diunc bhou connavoi-bapai nasloleam gorjevontam burgueanc. Zitiam burgueancho jiu sambaulo ani aiz bore vollnen voir sorleant tachea doiall callzachea adaran. Mons. Herculanachem zorui somest dukh cortat, ec Goencho monadic padre ani sobecho boro cornar munn, xemboriani munxeam mirmireani roddtat aplo pai munn. Ani achi govai tachea mornachea disa polleli tachea mornanc ajir asleleanim, jedna tim itlim sogott nennar babddim burguim veddo galun tachea moddeac, ueliani roddttalint, zoxim panzreantlim pilam, pilamche combiec dorun velea uprant, vhoddan roddttat, sãuronastana, acantac sampddon. Ajir asleleanchim callzam virlim, hi calliz movallteli corni polleun, ani monant vichar ailo, kitlo ho bhaguevont munis hea burgeanchi apurbai cori gai munn. Oi khoreponnim, zoxem ami voir sanglam Mons Herculano vortoulo khoro pai hea pai nasloleam burgueancho. Tancam posunc ani voir caddunk tannem sogllem aplem zoddlelem tem moddlem, ani aplea lagim godddona tedna to bikec guelo, ani bic magun sabar apleam ixttam laguim, tannem tancam poslim. Dusro monument zo Mons.Herculano dovorta aplea phattlean vortouta ti Congottecheam Madrinchim Ord, jica assat atam 65 voir madri ani novis. Hem vortouta poilem Goenchem Congregação madrinchem amche Arkidiocezint. Hea motta vorvim zaitim cheddvam, bhou conn durboll, zancam orxim porsong aschonaslo Madrzaunc, aplem jivit Devak bhettounk paulim hea sopurnaechea besar. Mons. Herculan vortouta sttapnnar hea dexi congrasãuvancho, zaca tannem aplo jiu dilo. Tachea interrac zaito loc ajir also, 40 sumar padre,soglleo Conventacheo Madri, ani Orphanatachim burguim, Little Flower Iscolachim ani heram Iscolanchim burguim, ani her Asosiasãuvam, Confrari, ani sabarloc, dadle toxeo bailo. Mornanc presidir kelem poilem Cong. Joao Paulo de Souza annem, ani uprant Mons. Tomas de Aquino Barreto, Vigar Geral, Patriarc Saibacho reprsentant, Padrim modem aslet Cong, zaite vigar, Ponjecho Vigar Pe. Edmundo Fernandes, Franciscan padri, Salesian, ani Pilarche Dr. M. Miranda, Redactor “V. Jose Vaz” etc. Pollounc disonuim ec morn, pun ec vhoddlem Corezmantlem pursãu. Igorjechea adrar pautoch tachem modem velem padrinim khand marun. Loc chombeanim addon-moddon poddtalo moddeacho umãu geunc; avoi bapui dactteam burguenc bagoun tencoitalet tachea caixãuvanc; puscoll loc roddtalo ducanim. Fondd purlea uprant uloilo Cemitirichea daran, Srs. Tome Pinto, Pe. Alcuino Colaço, Vigar Porricho, Pe. Mendonça Arporchea Iscolacho Principal ani Adv.Amadeu Prazeres da Costa, Redactor O Heraldo potracho. Mons. Herculan dovorta amcam vhodd dekh aplea bhaguevont jivitachi bhou con caridad dublleam thãim. Ami tachea paulanim cholum-ia ani tedna to amcam mellun guetolo sorguinchim besãuvam Deva mucar zuim to favo zaleli muzri bogta oxem munn visvasan rabtãu.
