Article for Vauraddeancho Ixtt

Msgr. Herculano Gonsalves – Koxttovtolea Monxakullak Bhorvanxeachem  Kirnn

Sonvsarant ami nodor marlear, apleponnank ani gorvak lagun, zogddim-zuzam ani dusmankai vaddot vetat.  Dusre vatten ami polletanv, kaim monxam apleakuch visrun, koxttovtoleam sovem mog, moipas ani doya dakoun sounsarant dukh unnem korunk vavurtat. Gorje pormonnen tannim aplea kallar boreponnacho uzvadd ximpddaunk pottiddken vavr kelo ani sounsarnt borea korneacho ugddas dovorlo. Kaim zannanim apnnem pettoilolo boreponnacho uzvadd, dusreani pettlolo dovorche khatir sonvstha sthapon keleo. Ani aiz kiteleoch sonvstha tanchea fuddareancho boro vavr chalu dovortat.

Marsache 21ver 2025  osleach eka monxachea 75vea Punyatithicho Dis ami somarombtanv.  To mhollear, Msgr. Herculano Gonsalves. Ho gunnest ani bhagivont Goencho padri, zaun aslo Cana-Benaulim hea ganvcho. 1934 vorsa tannem Kongottchea ganvant, Goeant piolich Madrinchi Sonvstha sthapon keli.

54 vorsam Devachea molleant, Damau, Mumboi, Goyant ani Ghanttavelea vattarani, Belgaum tem Poona meren  tannem oprotim vavr kelo ani Devadin zalea uprant 75 vorsam sorgar thavn tench missanv to korit asa. Apnnakuch mourn, gorv pois korun jieunk tannem xikoilem. Khaltikaiecho xegunn tachea jivitant odikuch porzolltalo. Jezuchea panvlamnim cholun, apnnakuch visrun, soglli apli jinn tannem peleache sevek orpili. Kherit baxen, durbollanchea ani koxttovtoleanchea adarak to pavlo. Magnnem, khaltikai, ogeponn, gupit jivit, ani vhoddilachea utrak pallo divop, he bhov vorte xegunn, Saibinn Mai, Sam Juze, Sant Alex ani Ballka Jezuchem dhakttem ful-SantTerezin, hanchea jivitantle tannem apnnaile. Ani zait ghoddie, heach tachea ogeponnachea ani khaltikaiechea xegunnank lagun, tachem bhagivonponn-ui, azun porian lipunuch urlam.

1950 vorsa tachea morna somoiar, O Heraldacho sompadok, Mr. Amadeu Prazeres da Costa, tea bhagivont padri vixim oso  uloilo: Swarth, apleponn ani vaitt vonddavnnyani kudd’dem  zal’lea moniskulla modem, Msgr. Herculan Gonsalves,  ek uncha mollachea gunnacho monis upzolo, zannem hea sonvsarant kottin provas kortoleancher, aplea shudh nirmoll gunnachea porzollit kirnnancho uzvadd ghalun, tachem jivit uzvaddan bhorlem. 

Msgr. Herculan vortoulo ek khoro missionar, zo nhoich Damau, Mumboi, Goeam, Seminarini, Firgozani, toxench Ghanttavoilim bhirankull ranam ani dongor utrun Belgaum tem Pune meren Jezucho  mog ximpddait gelo,  punn patkachea bharan cheploleank ani vaitt visank sampodloleank aplo hat diun, borea margar haddunk  bharim vavurlo. Aplo jiv riskar ghalun ani aplea nanvachi porian porva korinastana, kalljidarponnan, Mumboichea kaim kuddani ani patkachea suvatani porian to bhitor sorun, ek boro gonvlli koso aplea xellianche sodhik gelo. Vaitt rosten chotoleank Devacho mog tannem chakunk dilo ani bhorvanxeachim kirnnam tanchea jivitant fankoilim. Amchea Goenchea choddxea firgozani tannem Devachem Utor porgottlem. Padrink, Seminaristank, Mottvaxeank ani Loukikank tannem Retir dile. Bandra Mumboi, Franciscan Hospitaller Madrinchea Conventacho, 22 vorsam, to atmik guru ani kumsar padri aslo. Xikxonnachea mollar tannem bhov moladik vavr korun, goribam khatir xalla ugddun, xikxonna vorvim tancho fuddar porzollit kelo.  Khoreaninch, Padri Herculan bhagivont jivit jielo ani Povitr Sobhechea bhurgeam passot aplo jiv zhoroun, to atam sorgar Santam-bhoktachea vhoibhovan asa mhonn amkam purnn khatri asa.

Tannen Goem ani Damauchea dhormprantant sthaplole Sonvsthecheo bhoinni, Handmaids of Christ, Msgr. Herculanachea Santkoronacho Vavr fuddem vhorunk vavurtat.  Msgr. Herculanachem nanv gheun, bhavartan Deva lagim maglole upkar zaitea zannank favo zaleat. Piddestank pekounni mell’lea, bhurgim nasloleank bhurgeachem dennem favo zalam, bori nokri, ani kuttumbant upraslole prosn suttave zaun, kallza-monank xanti-somadhan mell’lam.

Aiz amchea koxttovtolea sonvsarak, Msgr. Herculan zaun asa ek bhorvanxeachem kirnn ani bhavathacho khambo, zache vorvim jivitant yetolea avhanank fuddo korunk amkam  boll mell’tta.

Eka Santachem jivit ak’ke Povitr Sobhechem bhagivontponn vaddoita ani khas korun jea-jea  vatarant ani dhormprantani to bhagivont vavurlo. Jitle odik Sant-bhokt astat title odik Deva mukhar amche khatir vinoti kortole amkam favo zatat. Aichea kallar amchea padrink, mottvaxeank ani loukikank dekhivont nomunnneanchi goroz asa. Ani Padri Herculan amchea dhormpranthacho osloch ek porzollit nomunno zaun asa, zo amkam zonn ekleak  aplo uzvadd dakoita ani bhorvanxean jieunk  apoita. Jezuchea panvlanim cholun, koxttovtolea moniskullak bhorvanxeachim kirnnam zaunk to amkam avhan dita.

Kednam to dis yetolo, jea disa amchea Goenchea bhagivont padri putak, Msgr. Herculan Gonsalvesak ami altarar polletoleanv? Bhorvanso amkam fottoina! Dehkun ami tea disachi vatt polloit ravtana, magnnem korum-ia,  tachi dekh gheun, tache xegunn apnnaun, somazant bhorvanxeachim kirnnam fankoum-ia.

Sr. Perpetua Vaz

St. Alex Convent, Calangute