Monsenhor Herculanachea Manank
- Posted by Handmaids of Christ
- Posted in Fr. Founder
Tachea 75vea Punyatithi Disak
21st March 2025
Monsenhor Herculanachea Manank
Tachea 75vea Punyatithi Disak
- Vavraddeachea Ixttar dukachi khobor xaploli
1950 voros, tarik 21 Marsachi
Ontorlo ek xegunnani bhorlolo padri
Aikun khobor tachea mornachi
Ak’kem Goem ani Bomboi roddlem dukhani
Goencho manadik padri ani Sobecho boro kornnari
Nimnno adeus taka korunk lok gelo romarini
Sogllea dhormache ani zatinche monis taka mani
Kiteak to soglleank borem kori
- Zaitea bhurgeancho jiv tannem vanchoilo
Onathank ek asro bandun dilo
Tankam jevonn-khann, nhesonk-pangrunk diunk
Aplea rogtachem kelem udok
Pankollie sarkea kallzan onath bhurgeank sambaullim
Pai –mai naslolea bhurgean apunn zalo mogacho Pai
Apnnem zoddlolem tem sogllem tankam posunk moddlem
Aslem-naslem sogllem somptoch ixttam koddlean rinn kaddlem
Xekim bhikek porian gelo fokot tea bhurgeank boro fuddar diuncheak
- Dekhun tachea interrac hajir asloleani
Dekhli ek atvich ghoddni
Tim babddim itlim sogott nennar bhurgim
Veddo galun tachea moddea bhonvtim
Bobo hueli martalim mirmireani
Pai, Pai, mhonnon roddttalim
Zoxim lhan pilam panzreantlim
Kombiek kaddun vhela uprant tanche sorxili
Akantak sampddon saunronastana roddttalim
- Simitirin vhortana kaxaianv, pixim koxim fattleam dhanvtalim
Denvoitoch to kaixanv fondant
Kil’lanch marun eka onath bhurgean
Uddki marli bhitor tachea fondant
Amkam sandun khuim vetai Pai ?
Vocho nakai, tum amkam zai!
Taka sangat diun ponnas bhurgeancheo killancheo
Vocho nakai Pai, tum amkam zai!
Lokan bobatt kelo, bhurgenk ogi korat, padrik magnnem korunk diat
Doyall kallzacho Padr. Vigar Lobo mhonnonk laglo,
Bhurgeank addaum nakat, roddum di tankam, tancho Pai mela
- Hajir asloleanchim kallzam virun gelim
Polleun hi dukhachi ghoddni,
Ani monant vichar ailo
Kitlo ho bhagivont monis
Hea bhurgeachi apurbai kori?
Khorench vorto to bhagivont padri
Zannem lambdik jinn apli zhoroili
Korun mog Devacho ani seva peleachi
To nhoi dusro bogor amchoch ‘Goencho Padri’
Monsenhor Herculan Gonsaves, Onathancho Pai subhagi!
Sr. Perpetua Vaz H.C. (St. Alex Convent, Calangute)
